ინიციირება, სამოქალაქო განათლების ლექსიკონის მიხედვით, ნიშნავს რაიმე საკითხის წინ წამოწევას, საკუთარი ინიციატივით დღის წესრიგში დასმას.
ჩვენს სამუშაო პრაქტიკაში ხშირად ეწყობა ინიციირებული ღონისძიებები. განსაკუთრებით - ახალგაზრდულ ჯგუფებში.
ტრენინგებზე ახალგაზრდები ეცნობიან სხვადასხვა თემას კონფლიქტების მართვასთან თუ ძალადობასთან დაკავშირებით. შემდეგ კი თვითონ ავლენენ ინიციატივებს და ატარებენ საინფორმაციო შეხვედრებს და კონკურსებს, ამზადებენ ვიდეორგოლებს და პოსტერებს, წერენ ესეებს, ხატავენ თემატურ ნახატებს და ა.შ.
ახლა აქტიურად იმართება ტრენინგები ახალგაზრდულ ჯგუფებთან და პარალელურად იგეგმება ინიციირებული ღონისძიებები. ეს ინფორმაციის გავრცელების ერთ-ერთი მნიშვნელოვანი ფორმაა.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ხუთმა ახალგაზრდულმა კლუბმა მიიღო ქალთა ფონდი „სოხუმის“ მცირე გრანტი. და ხუთ მუნიციპალიტეტში ჩატარდა ტრენინგები აქტუალურ თემებზე.
საპროექტო განაცხადში თერჯოლის ახალგაზრდული კლუბის წევრები წერდნენ: თანამედროვე მსოფლიოში მშობლებისა და შვილების ურთიერთდამოკიდებულება ხშირად დგას გამოწვევების წინაშე. ამ პრობლემის შესაცნობად და ურთიერთობების გასაჯანსაღებლად შევიმუშავეთ პროექტი „ჰარმონია ოჯახში – ურთიერთგაგება თაობებს შორის“. ტრენინგზე იყო აქტიური დისკუსია, შთამბეჭდავი ემოციები და სამომავლო გეგმების დასახვა...
ამ თემას მიუძღვნა ტრენინგი წყალტუბოს ახალგაზრდულმა კლუბმა: „მშობლებისა და შვილების ურთიერთობების გავლენა პიროვნულ განვითარებაზე“. მონაწილეებმა „ემოციების ხეზე“ სიმბოლურად გამოხატეს დამოკიდებულება მშობელ-შვილური ურთიერთობების მიმართ. იყო აქტიური ჩართულობა, როლური თამაში „შეცვალე პერსპექტივა“, დისკუსია. ერთ-ერთმა მშობელმა აღნიშნა: „შთამბეჭდავი ტრენინგი იყო. ვისაუბრეთ და მოვუსმინეთ ერთმანეთს. მსგავსი შეხვედრები ხშირად უნდა ტარდებოდეს!“
ქალთა ფონდი „სოხუმის“ ფსიქოლოგმა შეხვედრები ჩაატარა სენაკის, ხობის, წყალტუბოს, ვანის და თერჯოლის ქალთა მხარდაჭერის ცენტრებში. მან შეხვედრებზე ისაუბრა იმაზე, თუ რა ზიანს აყენებს ბავშვებს ძალადობა.
- ძალადობაგამოვლილ ოჯახებში აღზრდილი ბავშვების უმრავლესობა გამოირჩევა აგრესიული ქცევით. ბავშვი ადრეული ასაკიდან გამოიმუშავებს აგრესიული რეაქციების დამახასიათებელ სტილს და ინარჩუნებს ხანგრძლივი პერიოდის განმავლობაში. ბავშვისთვის გარესამყარო მტრულადაა განწყობილი, უძლიერდება საფრთხის შეგრძნება და, სავარაუდოდ, მისი რეაგირებაც აგრესიულია. ამიტომ ბავშვი ადრეული ასაკიდანვე უნდა დაიხსნას მშობელმა ძალადობრივი გარემოდან, - აღნიშნავს ფსიქოლოგი ეკა ქვაჩაკიძე.
ქალები ფსიქოლოგის რჩევებს სასარგებლოდ მიიჩნევენ და ეს შეხვედრებიც მნიშვნელოვანია მათთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
წყალტუბოს ინოვაციურ ცენტრში ქალთა ურთიერთდახმარების ჯგუფის შეხვედრაზე წარსდგა ჩვენი ფორუმ-თეატრი. მონაწილეთა დიდი ინტერესი გამოიწვია წამოჭრილმა პრობლემებმა. დისკუსიის დროს მათ აღნიშნეს, რომ აუცილებელია პრობლემებზე რეაგირება და საზოგადოების დამოკიდებულების შეცვლა.
მეორე შეხვედრა ფორუმ-თეატრმა წყალტუბოს სკოლაში გამართა. თანატოლების წინაშე გამოსვლა ყოველთვის საინტერესო და საპასუხისმგებლოა. მოსწავლეებს მოეწონათ წარმოდგენები, აქტიურად ჩაერთნენ როლებში, გულახდილად ისაუბრეს ახალგაზრდა თაობის პრობლემებზე და მათი მოგვარების გზებზე.
ფორუმ-თეატრის გამოსვლები აფიქრებს მაყურებელს და სწორი გამოსავლის პოვნაში ეხმარება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
აქ დაგვხვდა თბილი გარემო, მზრუნველი ადამიანები... ვიგრძენით სიყვარული, ყურადღება, მხარდაჭერა... - ამბობდნენ წასვლის წინ ქალები და გამოხატავდნენ მადლიერებას, რაც ადამიანების საუკეთესო თვისებაა.
დედების და შვილების კიდევ ერთი ჯგუფი გააცილეს ქალთა ფონდი „სოხუმის“ სარეაბილიტაციო ცენტრიდან. ეს ოჯახები ირიცხებიან სოციალურად დაუცველთა ბაზაში და ამასთანავე არიან ეკომიგრანტები. მათთვის განსაკუთრებულად კარგი იყო სარეაბილიტაციო ცენტრში გატარებული დღეები, თერაპიული სესიები, სასარგებლო ინფორმაციების მიღება, განტვირთვა და რეაბილიტაცია... ყველა აქტივობაში დიდი ინტერესით ერთვებოდნენ. ეს მათი სამახსოვრო ჩანაწერები და ჩანახატებია...
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
მარტში ახალგაზრდების გაძლიერების ცენტრებში დასრულდა კიდევ ერთი სატრენინგო კურსი. აპრილში კი 10 მუნიციპალიტეტში ჩამოყალიბდა ახალი ჯგუფები. ამ პროცესში აქტიურად იყვნენ ჩართულები პედაგოგები, წინა სატრენინგო კურსის ლიდერები. წარმატებით ჩატარდა სატრენინგო კურსის პირველი თვის სამუშაო.
- სიძნელეები გვხვდება, მაგრამ, მიუხედავად ბევრი შემაფერხებელი ფაქტორისა, ვფიქრობთ, რომ ფორმირებულ ჯგუფებთან გავაგრძელებთ ტრენინგების ჩატარებას, - აღნიშნავენ ტრენერები.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
რა პრობლემები აქვთ ქალებს სხვადასხვა თემში, როგორ აგვარებენ ამ პრობლემებს, როგორ ხდება ოჯახური ძალადობის შემთხვევების იდენტიფიცირება და რა გამოწვევებს აწყდებიან, - ძირითადად, ამ საკითხებზე გაიმართა მსჯელობა ქალთა მხარდაჭერის ცენტრებში გამართულ სამობილიზაციო შეხვედრებზე.
მონაწილეთა შეფასებით, ყოველთვიური შეხვედრები მათთვის ინფორმირების წყაროა - ეცნობიან ახალ ინფორმაციებს, საუბრობენ საკუთარ პრობლემებზე, ცდილობენ, ხელი შეუწყონ ოჯახური შემთხვევების იდენტიფიცირებას, დაეხმარონ ქალებს სათემო პრობლემების მოგვარებაში. ისაუბრეს ეკონომიკური მხარდაჭერის პროგრამების მნიშვნელობაზე. მიაჩნიათ, რომ ქალებს არა აქვთ საჭირო უნარები, რათა იდეა პროექტად აქციონ და საკუთარი შემოსავალი ჰქონდეთ.
ოჯახური ძალადობის შემთხვევების იდენტიფიცირების და მსხვერპლთა დახმარების კუთხით მობილიზატორებთან ერთად აქტიურად მუშაობენ პარასპეციალისტები.
მთელი თვის განმავლობაში ქალთა მხარდაჭერის ცენტრებში 150-ზე მეტ ქალს მიეწოდა ინფორმაცია ოჯახში ძალადობის მსხვერპლთა დახმარების სერვისებზე. ფსიქოლოგთან კონსულტაციაზე გადამისამართდა ათი ქალი. სამმა ქალმა იურისტის დახმარებით მდგომარეობა გაიუმჯობესა.
სოციალური მუშაობის გაძლიერებით ქალთა მხარდაჭერა უფრო ეფექტიანად მიმდინარეობს.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ ორგანიზებით, კანადის თანასწორობის ფონდისა და გერმანული ორგანიზაცია „პური მსოფლიოსათვის“ მხარდაჭერით, გაიმართა კონფერენცია თემაზე: „ქალთა მიმართ ძალადობის პრევენცია და რეაგირება თემზე დაფუძნებული მიდგომებით - პრაქტიკა და ზემოქმედების მექანიზმები“.
კონფერენცია გახსნა ქალთა ფონდი „სოხუმის“ თბილისის წარმომადგენლობის ხელმძღვანელმა ეკატერინე გამახარიამ. მონაწილეებს მისასალმებელი სიტყვით მიმართა ქალთა ფონდი „სოხუმის“ თავმჯდომარემ ალლა გამახარიამ.
ქალთა ფონდი „სოხუმის“ ციფრულ რესურსცენტრზე - ძალადობაგამოვლილი ქალებისთვის სერვისების მიწოდებისა და გაძლიერების ერთწლიან გამოცდილებაზე ისაუბრა თეა თორინავამ, ორგანიზაციის აღმასრულებელმა დირექტორმა.
კონფერენციას ესწრებოდნენ ქალთა მხარდაჭერის ცენტრების მობილიზატორები 10 მუნიციპალიტეტიდან, ურთიერთდახმარების ჯგუფების წევრი ქალები, სოციალური სამუშაოს პარასპეციალისტები და ქალთა უფლებებზე მომუშავე სამოქალაქო საზოგადოების ორგანიზაციების წარმომადგენლები.
გაიმართა ორი პანელური დისკუსია. აღინიშნა, რომ 10 მუნიციპალიტეტში დაფინანსდა 14 სამოქალაქო ინიციატივა, რომელიც ქალებისა და ბავშვებისათვის არაძალადობრივი გარემოს შექმნას ემსახურებოდა.
კონფერენციის დასასრულს, ორგანიზაციის დამფუძნებლებმა - ალლა გამახარიამ, მერი გელაშვილმა და ნანული რამიშვილმა გაიხსენეს ორგანიზაციის 28-წლიანი ისტორია და მონაწილეები მოტივაციით აავსეს.
ქალთა ფონდი „სოხუმი“ განაგრძობს მუშაობას ძალადობის პრევენციისა და ქალთა გაძლიერებისთვის.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ახალგაზრდობის გაძლიერების ცენტრებში შემაჯამებელი შეხვედრები ცოტაოდენი ცვლილებებით ჩატარდა. იყო პრობლემები, მაგრამ ამის მიუხედავად, ახალგაზრდები მაქსიმალურად ჩაერთნენ სატრენინგო პროცესში. ისინი აღნიშნავდნენ, რომ კურსის განმავლობაში ბევრი რამ ისწავლეს, დაიხვეწა მათი სასწავლო თუ ტექნიკური უნარები, რაც გამოადგებათ სასწავლო პრაქტიკაში.
ახალგაზრდებისთვის განსაკუთრებით მნიშვნელოვანი იყო კურსის დასრულების დამადასტურებელი სერტიფიკატების მიღება. უკვე აქტიურად დაიწყო ახალი ჯგუფების ფორმირება.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)
ქალთა ფონდი „სოხუმის“ მონიტორინგის ჯგუფმა განაგრძო საინფორმაციო შეხვედრების ციკლი მოწყვლად ჯგუფებთან. შეხვედრები ჩატარდა წყალტუბოს, ხონის, სამტრედიის, თერჯოლის, ვანის, სენაკის, ზუგდიდის, ჩოხატაურის, ხობის და წალენჯიხის მუნიციპალიტეტებში.
შეხვედრის მონაწილეებს მიეწოდათ ინფორმაცია ადგილობრივ და ცენტრალურ პროგრამებზე, რომლებიც არსებობს ქვეყანაში ძალადობის მსხვერპლთა დახმარების და გაძლიერების და აუტისტური სპექტრის მქონე ბავშვთა რეაბილიტაციის და აბილიტაციის კუთხით.
მონაწილეები ასევე გაეცნენ ქალთა ფონდი „სოხუმის“ მონიტორინგის ახალ მოკლე ანგარიშს „ძალადობაგამოვლილი ქალების მხარდაჭერის სერვისები: ხელმისაწვდომობა და ბარიერები“. ანგარიში ასახავს კვლევის მიგნებებს, რომლებიც ეხება ძალადობაგამოვლილი ქალების ხელმისაწვდომობას მხარდაჭერის სერვისებზე და მოსახლეობის დამოკიდებულებას მათ მიმართ.
პროექტი ხორციელდება ორგანიზაცია Brot für die Welt - Evangelischer
Entwicklungsdienst მხარდაჭერით (გერმანია)